ཨ་འཇམ། (ཨ་རི།)

རྒྱུན་ལྡན་མཚན་མོ་ཞིག་ཀྱང་གློ་བུར་དུ་འཕག་ནས།།
ས་དང་རྡོ་བ་གཏུམ་པོས་དབུགས་བཏུམ་ལ་བཅུག་སོང་།།
འཚོ་བའི་རྨི་ལམ་ཞིག་པའི་ས་རྡུལ་གྱི་འོག་ན།།
ངུ་འབོད་སྟོང་ཕྲག་སྐར་མདའ་ཤར་ཤུར་དུ་འཐེན་སོང་།།

དགུན་གྱི་ཙག་ཁ་གདངས་པའི་མཆེ་བ་ཡི་བར་ནས།།
རྩིབས་རུས་ཧྲིག་ཧྲིག་བཅག་པའི་གནམ་ས་ནི་ཡོམ་སོང་།།
རྩི་རྐང་ཤུགས་གླུ་ལེན་པའི་གནའ་གྲོང་གི་དིང་རི།།
མཁར་ཆག་སྐྱ་བོ་གཟེངས་པའི་རླུང་ནག་གིས་བཅུམ་སོང་།།

འཇམ་མཉེན་ལག་བརྡ་ཕྲ་མོ་རྩིག་སྲུབ་ནས་འབུད་དུས།།
བྲང་ལ་སྦྱར་བའི་གཅེས་ཕྲུག་གསོན་ཉམས་ཀྱིས་བརྟས་འདུག།
ཚེ་སྲོག་རེ་རེར་འཐམ་པའི་གཏམ་རྒྱུད་ཀྱི་ཟུག་རྔུ།།
སྙིང་ལ་བྲབ་པའི་ལྕག་ཚན་དམར་ནག་ཏུ་གྱུར་སོང་།།

གསུང་རབ་འཁུར་བའི་ཡ་གིའི་ཆོས་ལམ་ནི་རིང་མོ།།
ས་གཞི་སྤྲུགས་པའི་ཤུལ་གྱི་དུར་ས་རུ་གྱུར་སོང་།།
བདག་པོ་མ་རྙེད་འབོད་པའི་ལུང་སྟོང་གི་མཚན་མོ།།
ཨ་ཅེ་པི་ཝང་བོར་བའི་ཆག་སྒོ་ནི་འཁོར་སོང་།།

ཇོ་མོ་གླང་མས་སྲུང་བའི་གཡང་ཆགས་ཀྱི་མི་སྡེ།།
སྟོད་གཞས་གློ་བུར་འགག་པའི་མགྲིན་པ་ནི་བརྣངས་སོང་།།
ཤིང་རྟ་དལ་བུར་འདེད་པའི་འཁོར་མདའ་ནི་ཆག་པས།།
ས་འོག་ལུས་པའི་རྣམ་ཤེས་འཚོལ་བ་ལ་བྲེལ་སོང་།།

བརྡ་འཕྲིན་གསར་བས་བོས་པའི་ཤ་ཉེ་ཡི་སྐུ་མགྲོན།།
རྨ་རྒྱལ་སྦོམ་རའི་ཉིན་སྲིབ་རེ་རེ་ནས་ཆས་སོང་།།
ལག་དང་སྐད་ཆ་འཁེང་བའི་སྐར་ཆ་ནི་རེ་རེ།།
ལོ་ཟླ་སྟོང་ཕྲག་མནན་པའི་ལྕི་ཚད་ཅིག་བྱུང་སོང་།།

རིགས་པའི་ཐལ་སྒྲ་བཙན་པའི་ལྷ་ཆོས་ཀྱི་སྡེ་ཆེན།།
མྱ་ངན་ཟེ་བ་འདར་བའི་མཁར་མོ་དེ་ཉིལ་སོང་།།
མི་སྡུག་འཚོ་བའི་སྲུབ་ལ་སེན་མོ་ཡིས་བྲད་ནས།།
ཚེ་སྲོག་རྟ་རྔ་ཙམ་ལ་སྐྱོབ་པ་ལ་བྲེལ་སོང་།།

ལག་པ་མང་བོ་རུབ་པའི་ལྷགས་རླུང་གི་བར་ནས།།
མཆི་མའི་ལོ་རྒྱུས་ཐིགས་པས་རྩིག་པ་དེ་འགྱེལ་སོང་།།
པང་གདན་ཁྲ་ཁྲ་ཅན་གྱི་ཨ་མ་ནི་རྒན་མོ།།
ནམ་མཁའ་ནག་པོར་འོ་དོད་ཤེད་ཚད་ཀྱིས་བོས་སོང་།།

རང་རང་སེམས་ཀྱི་རྟ་ཕོ་སྣ་ཚོགས་ཤིག་ཞོན་ནས།།
དིང་རི་བ་ཡི་མུན་ནག་བཤུ་བ་ལ་གཤར་སོང་།།
ངོ་ལ་ས་རྡུལ་གོས་པའི་བྱིས་པ་རེ་བསྲུངས་ནས།།
རང་ལེན་པར་ཆས་གཡས་སྐོར་གཡོན་སྐོར་ལ་བྲེལ་སོང་།།

སུ་ལ་འཁང་ར་མེད་པའི་ཀི་སྟོང་རེ་ཤོར་ཡང་།།
རྩིག་པའི་རྒྱུ་ཆ་དེ་ལ་སེམས་ཁྲལ་གྱིས་བརྟས་བྱུང་།།
སྡོད་ཁང་གྲུ་བཞི་རེ་རེ་རྨེག་མེད་དུ་འགྱེལ་དུས།།
འཛུགས་སྐྲུན་སྐད་པོ་ཆེ་ལ་ཐེ་ཚོམ་གྱིས་བཏགས་སོང་།།

སང་ཉིན་ཟེར་བའི་ཉི་མ་ཡག་པ་དེར་ཚོམ་ཡང་།།
འདུ་བྲལ་མཆོད་པའི་མར་མེ་ཡིག་དྲུག་ལ་སྒྲོན་སོང་།།
བྱང་གི་ཨ་རི་ཞེས་པའི་རྒྱུས་མེད་ཀྱི་ཡུལ་ནས།།
གདུང་སེམས་མཚོན་པའི་ཡི་གེ་ནད་པ་འདི་ཤོར་སོང་།།

༢༠༢༥ ༡ ༨