ཚེ་རིང་སྐྱིད། (ཨ་རི)

ངག་གི་སྲུང་མ།
ངས་གཞན་གྱི་ངག་འགྲོས་ལས་ཁྱེད་རང་རྙེད་པ་དེ་ཡང་།
འུ་ཚོའི་བར་ན་རི་ཚོགས་དང་རྒྱ་མཚོ་ཡོད་པ་ཁོ་ན་མིན་པས།
ང་ལ་བཟོད་གསོལ་མཛོད།

ཁྱེད་རང་རི་བོའི་ཕྲག་ཁ་ལ་བུད་དེ།
རང་གི་ལྟེ་ཁྲག་འཕོ་སའི་ཕ་སར་ཅེར་བཞིན།
མིག་འོད་དུ་མཆི་མ་འཁྲུག་བཞིན་པ་ངས་མཐོང་མྱོང་།

པེ་ཅིན་གྲོང་ཁྱེར་དུ་འབྱོར་བ་ཇི་ལྟར་ཆེ་ཡང་།
ཐོག་བརྩེགས་དང་རླངས་འཁོར་གང་འདྲ་མང་རུང་།
འདུ་འཛི་ལང་ལོང་ཇི་ལྟར་རྒོད་ཀྱང་།
ཁྱེད་དང་ཁྱེད་ཀྱི་ཕ་ཡུལ་དེ་ཚོར་འབྲེལ་བ་ཅི་ཡང་མེད།
དེ་བས།
ཁྱེད་རང་ཁེར་རྐྱང་ངང་། རྐང་ཐང་དུ་བསྐྱོད་དུས།
མིང་ཆེན་པོ་ཅན་གྱི་ཁྲིམས་ཁང་ཁག་ཏུ།
ཐ་ན་སྒོ་སྲུང་དེ་ཚོས་ཀྱང་ཁྱེད་ལ་ངར་ངར་བྱས་སྟངས་ཀྱིས།
ངའི་སྙིང་ལ་ན་ཟུག་སྐྱེས་མྱོང་།

ཆེས་སྤྱིར་བཏང་གི་ཁྱེད་ཀྱིས།
ཆེས་བླ་ན་མཐོ་བའི་མདུན་པ་ཞིག་ཏེ།
ཕོ་མོ་བརྒྱ་སྟོང་གི་ཡ་ཆུང་ན་འགུལ་ཞིང་།
ཤ་རུས་ཀྱི་གསེང་དུ་འཁྱིལ་བའི་མདུན་པ་དེ་གླེང་བས།
ཁྱེད་རང་མུན་ནག་ལ་བཅུག་སོང་།

ལྕགས་ཀྱི་དྲ་བར།
ཁྱེད་ཀྱི་ལང་ཚོ་དང་འོད་སྣང་འཕྲོག་ཅིང་།
ཁྱེད་ཀྱི་རང་དབང་དང་སྨྲ་སྒོ་བཀག
ད་དུང་ཁྱེད་ཀྱི་རྐང་ལག་ལ་ལྕགས་སྒྲོག་བསྐོན་ཏེ།
“ཁ་བྲལ་བ”ཞེས་པའི་རྟགས་ཀྱི་ཐམ་ཀ་བརྒྱབ།

དུས་དེ་ནས།
དེའུ་འབུར་ཞིག་ཏུ་བསྡད་དེ་རྒྱང་ལྟ་བྱེད་མཁན་ཁྱེད་ངས་ཡང་ཡང་དྲན་ཡོང་།
ཁྱེད་ཀྱིས་མ་མཐོང་བའི་ལོ་ཟླ་འདི་དག་ཀྱང་།
འུར་ཟིང་དང་འགྲན་རྩོད།
བག་མེད་དང་འཁོན་འཛིན་ཆེ་བའི་དུས་རེད།

འོ་བརྒྱལ་མང་པོ་མྱངས་པའི་ཁྱེད་རང་སླར་ཡང་དེའུ་འབུར་དེར་བུད་ནས།
ཉི་ཟླའི་ཤར་ནུབ་ལ་ལྟ་བཞིན།
དཔའ་ངར་ཞུམ་མེད་ངང་།
ལོ་ངོ་ལྔའི་གོང་གི་ལས་འཕྲོ་ལ་འཇུས།

གང་ཡང་འགྱུར་མེད་པ་དེ་སྙིང་སྟོབས་དེ་རེད་མོད།
དཔྲལ་བར་བབ་ཡོད་པའི་གཉེར་མ་དང་།
མིག་གི་འོད་མདངས་ཟད་པ་མཐོང་དུས།
ང་རང་ཁྱེད་ལ་ཧ་ཅང་སྙིང་ཉེ་སོང་།

དཔོན་པོ་ཆེན་པོ་ཚོའི་སྒོ་ཁ་ན།
ལས་ཁུངས་སྣ་མང་གི་འཁྱམས་ར་རུ།
ངུ་སྐད་འདྲེས་མའི་ཞུ་གཏུགས་ཀྱི་ཚིག་འབྲུ་རེ་རེ་གོ་དུས།
ཅི་བྱེད་འདི་བྱེད་མེད་ང་རང་།
སེམས་འགུལ་ངང་མིག་ཟུང་ལ་མཆི་མ་འཁོར་ཡོང་།

ཁྱེད་བདག་མེད་མིན་ཏེ།
གནམ་ནས་བབ་པའི་ལྷ་སྲས་མིན་ལ།
ས་ནས་འཁྲུངས་པའི་མེ་ཏོག་ཀྱང་མིན།
ཁྱེད་རང་ཕ་མ་ཞིག་གི་གཅེས་ཕྲུག་དང་།
བུ་ཆུང་ཞིག་གི་ཨ་ཕ།
ད་དུང་ཆུང་མ་ཞིག་གི་སེམས་རྟེན་ཡིན།
འོན་ཀྱང་། ཁྱེད་ཀྱིས་མེས་པོའི་རྣམ་ཤེས་འཐིམས་སའི་སྐད་ཡིག་གི་དབུགས་སྣེ་ལ་འཇུས་ནས།
སྙིང་སྟོབས་ཆེན་པོའི་བློས་གཏོང་འདི་མཐོང་ཚེ།
མཚམས་རེར། ང་རང་མི་ཡུལ་དུ་བདེ་བར་འཚོ་བ་ཡང་ངོ་གནོངས་ཡོང་།

ཕ་སྐད་ཀྱི་རྨུ་ཐག་གཅོད་མཁན་ལྷ་འདྲེ་མང་ས་རུ།
དཔའ་ཁེར་རྒྱུག་གི་ངག་གི་སྲུང་མ་ལྟ་བུའི་ཁྱེད།