འབུམ་རམས་པ་དགེ་བཤེས་ཆོས་འཁོར་ཚང་། (ཅེག་སྤྱི་མཐུན་རྒྱལ་ཁབ)

གཙང་ཆེན་ཁྲི་དང་འབུམ།
རྒྱ་མཚོའི་སྙན་པས་བསླུས།
འོན་ཀྱང་། ཁེར་རྐྱང་ལ་རོལ་བའི་རྒྱུག་ཆུ་ཞིག
རང་དབང་ངང་རང་ལམ་སྙེག

རང་སེམས་སྤང་ལ་གཏད་དེ།
རྫིང་བུར་ངལ་གསོ་ཞིང་།
མཚེའུར་སྐྱིད་ཉལ་རྒྱག

ལ་འགོ་ཡི་སྒྲུང་གཏམ་བཤད།
ལུང་གཤོང་གི་ལོ་རྒྱུས་ཉན།
ལ་སྟོང་དང་ལུང་ཁྲི་འགྲིམས།

བྲག་གཟར་ལས་མཆོང་བར་དགའ་བས།
བློ་ཁོག་གཟེགས་མར་ལྡིང་།
གྲོག་རོང་དུ་རྒྱུག་པར་བྲོད་པས།
གདེང་ཚོད་རླབས་སུ་འཕྱོ།

དེ་ལྟར་ན་ཡང་། མཐའ་ཡི་རྒྱ་མཚོར་མི་ཕྱོགས་ཤིང་།
དེར་འདྲེ་འདོད་ཀྱང་མེད་དེ།
རང་དབང་གིས་གྱར་བ་དེ་ལས་སྐྱིད་ཅིག་གང་ན་མཆིས།

གླང་རབ་གཙུག་ལག་སློབ་གཉེར་ཁང་(University of Oxford)ཆེན་མོའི་སྤྱང་ཕྲུག་གྲྭ་ཚང་(Wolfson College)དུ་༢༠༢༤།༠༩།༠༤ ཉིན་བྲིས།