ཡིད་ཀྱི་གཙང་བོ་འཕྱོ་ཞིང་ལྡེམ་པའི་རླབས།

—ཐེའུ་རང་། (བོད།)

ནང་མི་ལྷན་འཛོམས་ཀྱི་ཞོགས་ཀ་འདིར། ངས་རི་བོ་ཧི་མ་ལའི་ཕར་རྒྱབ་ཀྱི་སྐྱེས་བུ་གསེར་གྱི་ཉི་མ་འདྲ་བ་ཁོང་དྲན་འོང་། ཁོང་གི་སྐུའི་མཛེས་པ་རེ་རེ་དང་། གསུང་གི་སྙན་པ་རེ་རེ་གཟུགས་ལ་གཟུགས་དང་། སྐྲ་ལ་སྐྲ་ཡི་ཚུལ་གྱིས་དྲན་འོང་། མིའི་ལུང་པ་གཞན་ན་ཡུལ་གྱར་བའི་འཚོ་བ་རོལ་བའི་བྲང་ཁོག་གི་དྲན་གདུང་དང་ཁེར་རྐྱང་དྲན་འོང་། སྐུ་ཚེ་གང་བོར་མི་རིགས་ཀྱི་དོན་དུ། མིའི་རིགས་ཀྱི་དོན་དུ། འགྲོ་བའི་དོན་དུ་མྱངས་པའི་སྐུ་ཚེགས་དྲན་འོང་། དངོས་གནས་རྒྱལ་བཞེས་སོང༌། དཀའ་ཐུབ་ཀྱི་སྲས་པོ། ལྷོད་ལྷོད་ཨེན་ཙམ་གནང་ནས་འོ་ཇ་དཀར་ཡོལ་གང་བཞེས་རོགས།

ས་མཐའ་ན། འོ་མ་ཡོད་དམ། མར་དཀར་པོ་དང་ཞོ་རློན་པ་ཡོད་དམ། ཐུད་དང་གྱོ་མ་ཡོད་དམ། ནམ་ལོ་གསར་ཚེས་ཀྱི་ནངས་མོ་འདིར། ཕ་ཡུལ་གྱི་མི་ཚང་རེ་རེའི་མཆོད་ཁང་ན་ཁྱེད་ལ་མཆོད་པ་བཤམས་ཡོད། ཞོ་དང་འོ་མ། མར་དང་རྩམ་པ། ཐུད་དང་གྱོ་མ་བཤམས་ཡོད། ཕ་ཟས་ཀྱི་མཆོག་དང་ཕུད་ཁྱེད་ལ་འབུལ་ཡོད། ང་ཚོའི་སེམས་ཁོང་ན་སྡེར་ཁ་ཕུན་སུམ་ཚོགས་པ་འདི་ཁྱེད་ལ་ཕུལ་བའི་སྐལ་ཡིན་ལ། མཆོད་པའི་གསོལ་ཚིགས་འདི་ཁྱེད་ཀྱིས་མི་མངོན་པའི་གནས་གང་ཞིག་ན་སྤྱན་གྱིས་གཟིགས་ཤིང་། ཐུགས་ཀྱིས་བཞེས་ནས་ཡོད་ཨང་བསམ་ནས་ཡོད་མོད། དོན་ངོ་མར། ས་མཐའ་ན་ཁྱེད་ལ་ལྟོགས་སྐོམ་ཡོད་དམ། གྲང་འཁྱག་ཡོད་དམ། ཤིན་ཏུ་རླབས་ཆེ་ལ་ཧ་ཅང་ཉམ་ཆུང་བའི་མིའི་རིགས་ཀྱི་ཕྲུ་གུ་དཀར་པོ།

མི་ལོ་ག་ཚོད་ལ་ཁྱེད་ཀྱིས་བཀྲེས་སྐོམ་འཐུང་ནས་བསྡད་ཅིང་གྲང་འཁྱག་གྱོན་ནས་འདུར་བ་ཡིན། ངས་འདང་བརྒྱབས་པ་ཡིན་མོད། ངའི་བློ་ཁོག་ལ་མི་ཤོང་། དཀའ་ཐུབ་ཀྱི་ལོ་ཟླ་འདིར་མི་ལོ་བརྒྱད་ཅུ་ཙམ་གྱིས་ག་ལ་ཚད་དེ་མི་ཚད་། སྐྱེས་བུ་གཅིག་གིས་མི་རིགས་ཧྲིལ་ཁུར་ནས་མིའི་རིགས་ཀྱི་གྲལ་དུ་བཞུད་པའི་མི་ཚེ་ལ་མི་ལོ་བརྒྱད་བཅུ་ཙམ་གྱིས་ག་ལ་ཚད་དེ་མི་ཚད་དོ།།

ཁྱེད་ཀྱི་དཔྲལ་བའི་གཉེར་མ་རེ་རེ་འོད་ཀྱི་ཐིག་ལེ་རེ་རེར་སྦྲུམ། ངལ་དུབ་ཀྱི་རྔུལ་ཆུ་རེ་རེ་འོད་ཀྱི་ཐིག་ལེ་རེ་རེར་སྦྲུམ སྐྱོ་གདུང་གི་མིག་ཆུ་རེ་རེ་འོད་ཀྱི་ཐིག་ལེ་རེ་རེར་སྦྲུམ། ཕྱག་གི་སྟངས་སྟབས་རེ་རེ་འོད་ཀྱི་ཐིག་ལེ་རེ་རེར་སྦྲུམ། ཞབས་ཀྱི་སོར་མོ་རེ་རེ་འོད་ཀྱི་ཐིག་ལེ་རེ་རེར་སྦྲུམ།

གསུང་གི་བདུད་རྩི་རེ་རེ་འོད་ཐིག་ལེ་རེ་རེར་སྦྲུམ་ནས་མིའི་རིགས་ཧྲིལ་བོ་དྲོད་ལམ་མེར་བཏང་དུས། ངས་གཞི་ནས་ཧ་སོང་། ཁྱེད་ནི་འོད་ཀྱི་བདག་པོ་མཁའ་ཡི་ཉི་མ་འདྲ་བ་སྟེ། འཇིག་རྟེན་ཁམས་ཀྱི་སྨག་ནག་ཡོད་ཚད་ཉི་མ་གཅིག་གིས་དཀར་གསལ་ལེར་གཏོང་ནུས་པ་བཞིན། ཁྱེད་རང་གཅིག་པུས་མི་རིགས་ཧྲིལ་བོ་ཁུར་ནས་མིའི་རིགས་ཀྱི་གྲལ་དུ་བཞུད་པ་རེད། ས་མཐར་གྱར་བ་རེད། དཀའ་སྡུག་མྱངས་པ་རེད། ཁྱེད་རང་ཁོ་ནས་ཞི་བདེ་དང་བྱམས་བརྩེ་ཡིད་ལ་མནབས་ནས་མིའི་རིགས་ཀྱི་བདེ་སྡུག་དགོངས་པ་རེད།

བདག་གིས་ཁྱེད་ཉིད་མཐོང་ཐེངས་རེ་རེར། སྲབ་ལ་ཡང་པའི་ངུར་སྨྲིག་གི་ན་བཟའ་ནི་ཞི་བའི་གླིང་ཀ་ཞིག་ཏུ་མཐོང་འོང་། དེ་ན་གྲང་བའི་མི་ལ་དྲོད་ཡོད། ཚ་བའི་མི་ལ་བསིལ་བ་ཡོད། མ་རིག་པ་ལ་འོད་ཡོད། གདུག་པའི་ལག་པ་ཡིས་མེ་ཏོག་རེག་འོང་། ལྕགས་ཀྱི་མཚོན་ཆ་རབ་ཏུ་མཉེན་པའི་ལྗོན་ཤིང་དུ་སྐྱེས་ཡོད། བདག་གིས་ཁྱེད་ཉིད་མཐོང་ཐེངས་རེ་རེར། བརྩེ་བའི་འཛུམ་ནི་གཡའ་དག་པའི་གཙང་བོ་ཞིག་མཐོང་འོང་། དེ་ཡིས་མི་སེམས་ཀྱི་སྡུག་བསྔལ་འདག་འགྲོ། མི་དགེ་བ་འདག་འགྲོ། འཁྲུག་པ་དང་རྩོད་པ་འདག་འགྲོ། སྐྱོ་བ་དང་སྨྲེང་བ་འདག་འགྲོ་ཨང་། ས་སྒང་འདི་ན་གཅིག་ཁོ་ན་མ་གཏོགས་མི་བཞུགས་པའི་བོད་ཀྱི་གཅེས་ཕྲུག མིའི་རིགས་ཀྱི་སྐྱེས་བུ།  རབ་གཙང་བའི་ཞོགས་ཀ་འདིར། བདག་གིས་རབ་ཏུ་གཙང་བའི་ཁ་བ་ཅན་ནས་ཡིད་སེམས་རབ་ཏུ་དད་པའི་ཁྱེད་རང་དྲན་འོང་། དྲན་པ་འདི་ནི་ཅི་འདྲའི་དྲོ་ལ་ཅི་འདྲའི་གྲང་བ་ཞིག་ཀྱང་རེད་ཨང་།

ནམ་ལོ་གསར་ཚེས་ཀྱི་ཞོགས་ཀ་འདིར། ངས་ཁྱེད་ལ་མིའི་རིགས་ཀྱི་བདེ་སྡུག་མི་ཞུ། མི་རིགས་ཀྱི་སྐྱིད་སྡུག་མི་ཞུ། སེམས་ཅན་གྱི་སྐྱེ་འཆི་མི་ཞུ། ཞོགས་ཀ་འདིར། ཇ་དཀར་ཡོལ་གང་བཞེས་ནས་ཐུགས་ལྷོད་ལྷོད་ཙམ་བཞུགས་དང་དངོས་གནས་སྐུ་ཚེགས་མྱངས་སོང་། འོ་བརྒྱལ་ཆེ་སོང་།

ང་ཡི་བླ་མ། མགོ་ནག་བོད་ཀྱི་རྣམ་ཤེས་ཀྱི་རྣམ་ཤེས།

 

 

 

སྔོན་མ།
བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་དང་ཁོང་གི་བརྩམས་ཆོས་སྐོར་ཅུང་ཙམ་གླེང་བ།
རྗེས་མ།
ནུབ་བྱང་མི་རིགས་སློབ་ཆེན་དང་གྱེས་པ།

ལན་ཞོག

ཁྱེད་རང་གི་གློག་འཕྲིན་ཁ་བྱང་འགྲེམ་སྤེལ་མི་བྱ། Required fields are marked *

Fill out this field
Fill out this field
Please enter a valid email address.
You need to agree with the terms to proceed

keyboard_arrow_up